اماں گھماں :
لوک پیا اج عید مناوے
میں وی عید مسیتی پڑھی
ڈیکھنڑ اچ تاں کٌجھ نیں بدلا
ہر شئے اٌنج ہے ،ہر شئے اٌوھا
اٌوھا صفاں ، اٌوھا مولی ،اٌوھا ممبر ،اٌوھا مسلے ۔۔
اوھا چوکھر ،اوھا لیکاں ،اوھاماس تے اوھا بخرے ۔
ڈیکھنڑ وچ تاں سب کجھ اوھا
نٌوٹ کے اکھیاں ،چیتے اِچ میں جھاتی ماری ۔۔
رٌوح دی اکھ نال جو ڈِٹھا
کٌوکاں مار کے روح ہے رٌنی ۔۔
روح دے پھٹ بہوں ڈونگے ہوندن
دنیا اے پھٹ ڈیکھ نہ پاوے ۔۔
رٌوح دے وینڑ ہن عرٌش ھلیندے
ڈوری خلقت سٌنڑ نہ پاوے ۔۔
اماں گھماں
ڈکھاں دی پنڈ ،سر تے چا کے
جھولی نپ کرلاندا پیاں
لٌوں لٌوں وسی یاد ہے تیڈی
سنڑ اج توں فریاد اے میڈی
ناں کھرکے دی آواز آئ مینوں
ناں ککڑ بانگ ہے ڈتی
نہ چٌلھے اِچ جٌھلکا بلا
نہ چٌلھے اچ بھا ہے بکھی
نہ کیں میڈے منجے اتے
ڈوجی منجی دی چھاں آ کیتی
نہ اے میڈے کناں سٌنڑاں
“” وڈا ڈیں خدا دا اج تاں
اج تاں پتر وختو اٌٹھی
نہ اج میں آواز اے سنڑیں
خیریں ونجیں ،خیریں آویں
وھیڑے بھینڑاں دے پھرا آویں
نانی نوں وی ملا آویں “”
اماں گھماں
نہ او ویہڑا ،نہ او چٌلھا ،نہ گھڑونجی،
چار چپھیروں کندھاں ای کندھاں
گلاں اٌتے بٌوھے لگ گئے ۔۔
بٌوھاں اٌتے جندرے لگ گئے
نہ او چھپرا ،نہ او بیر دا درخت رہیا
جس دی چھاں دے تلے بھا کے
تڈے اتے پینڈ بنڑا کے
سارا ٹبر کٹھا بھا کے
تیڈے ہتھ دی بنڑی ہوئ کٹوی
وِچ سانڑک دے کٌٹ کے چوری
ہتھاں دے نال سوڑھے بھن کے
ہس ہس بھاجی کھاندے ہسے
رل مل عید مناں دے ہسے
اماں گھماں
جڈاں دی اس دنیا توں گئی ہیں۔۔
رونڑکاں ساریاں نال گھن گئی ہیں
سارا ٹبر کِھنڈ کٌھنڈ گیا اے
دھیاں پتر
بوہاری دے تیلاں وانگوں
وکھ وکھ تھی گئے۔
لہو دے رشتے پچھے رہ گئے
کوئ کسے دے گھر نیں ویندا
کؤی کسے دا حال نیں چیندا
جندڑی نمانڑیں رٌل گٌھل گئی اے
اماں گھماں
آکھٹر کنڑ اے عید دا ڈیں ہے
خلقت عید منیندی پئیی ہے
اساں وی ریت نبھیں دے پئے ہاں
فوناں اتے ،عید مبارکاں ،ڈیندیے پئے ہاں ۔۔
دل دا حال جو سچی پٌچھیں
جس گھردے وچ ماں نہ ہو وے
اٌس اتیم دیاں کیہریاں عیداں
اٌس اتیم دیاں کیہریاں عیداں
اماں گھماں
ہِک واری جو آ ونجیں ھا
ہِک پھیرا جو پا ونجے ھا
ٹھڈ پھٹاں دے پا ونجیں ھا
بلھا کے چلھے دے چار چپھیروں
سب نوں گل سمجھا ونجیں ھا
مت، نصیتاں ڈے ونجیں ھا
اتفاق دے دھاگے دے وچ ،
سب نوں، وت پرو ونجیں ھا
اماں گھماں
ہک واری تاں آونجیں ھا
ٹھڈ پھٹاں تے پا ونجیں ھا
اماں گھماں
شاعر:
ڈاکٹر طارق مسعود خان نیازی شہباز خیل
“MIANWALI KE MAREEZAN DA SAB TON VADDA MASLA: ‘IS NOON PINDI GHIN VANJO.'”
“AMMAN GHUMAN” DOCTOR TARIQ MASOOD KHAN NIAZI SHAHBAZ KHEL
