کالاباغ کی مختصر تاریخ و تعارف–قسط چہارم
ملک امیر محمد خان کے فرزندوں میں سے ملک اللہ یار خان کا سیاسی کردار صرف صدر ضیاء الحق کی مجلسِ شوریٰ کی رکنیت تک نظر آتا ھے جبکہ اس کی دو بیٹیاں محترمہ سمیرا ملک اور محترمہ عائلہ ملک نے سیاست میں خاصا کردار ادا کیا ،اور دونوں بہنیں قومی اسمبلی کی ممبر رہیں ،ملک امیر محمد خان کے باقی تین بیٹوں میں سے ملک اعظم خان لاولد تھے اور اپنی جاگیر کے معاملات اور سیاسی و سماجی محفلوں میں بہت کم شرکت کرتے ۔جب کہ ملک مظفر خان اپنے والد مرحوم کی جیتی جاگتی تصویر تھے،(بالاج)،اگرچہ والد صاحب کی طرح بڑی بڑی مونچھیں تو نہیں رکھی ھوئی تھیں لیکن سخت مزاج کے ساتھ ساتھ جلال ،تمکنت اور رعب و دبدہہ بھی خوب رکھتے تھے ۔۔ ملک مظفر خان نے ایچی سن کالج لاہور سے ہائیر سینئر کیمبرج کا امتحان گولڈ میڈل کے ساتھ پاس کیا ،اور ایف سی کالج لاہور سے بھی گولڈ میڈل کے ساتھ گریجویشن مکمل کی ،اور اعلیٰ تعلیم کے لیے انگلستان کا رخ کیا اور میڈل ٹپل لندن سے بار ایٹ لاء کیا اور اپنے وطن واپس آۓ تو خاندانی رسم و رواج کے مطابق سیاست میں حصہ لینا شروع کیا ،،جون 1962 میں بنیادی جمہوریت کے نظام کے تحت انتخابات ہوئے اور این ڈبلیو 36 کے حلقے میں قومی اسمبلی کا انتخاب لڑا اپنے مد مقابل مولانا عبد الستار خان نیازی مرحوم کو شکست سے دوچار کیا ،ممبر قومی اسمبلی کی حیثیت سے آپ کو بیرونی ممالک کے دورے کرنے کا موقع ملا ،1963ء میں ویٹ گیروز ایسوسی ایشن کی دعوت پر امریکہ کا دورہ کیا اور گڈ ول مشن کے ساتھ ایک وفد لے کر 1964ء میں جاپان گیۓ ،ان غیر ملکی دوروں میں آپ کے جاندار کردار نے حکومتی حلقوں میں آپ کا اثرورسوخ بڑھا دیا ،جون 1965م میں قومی اسمبلی کے بلا مقابلہ ممبر منتخب ہوئے ،1966ء اور 1967ء میں اقوام متحدہ کی جنرل اسمبلی کے پورے سیشن میں پاکستان کے نمائیندہ کے طور پر شامل رہے اور 7, دسمبر 1970ء کو ہونے والے عام انتخابات میں آزاد امیدوار کی حیثیت سے کامیاب ھوۓ اور منتخب ہو کر پاکستان پپیلز پارٹی میں شمولیت اختیار کر لی ،۔1973ء ایک وفد کے ہمراہ ایران کا سرکاری دورہ کیا ،27جون1973ء کو بوہڑھ بنگلہ ،کالاباغ میں تحریک ختم نبوت کانفرنس منعقد ہوئی جس میں کی میزبانی ملک مظفر خان نے کی ،جب قومی اسمبلی میں قادیانیوں کو کافر قرار دینے کا بل قومی اسمبلی میں پاس ھوا تو اس پر سب سے پہلے ملک مظفر خان نے دستخط کیے ،1975ء میں سرکاری دورے پر انگلینڈ جانے کا موقع ملا ،اور ان کی سیاسی تاریخ میں موڑ اس وقت آیا جب 7, مارچ 1977 کے قومی انتخابات میں پیپلز پارٹی کے ٹکٹ پر مولانا عبد الستار خان نیازی کے مد مقابل الیکشن لڑا اور کامیاب ہو گئے لیکن اس الیکشن میں پیپلز پارٹی کے مدمقابل قومی اتحاد نے مختلف حلقوں میں کھلی دھاندلی کا الزام لگایا اور تحریک نظام مصطفیٰ صلی اللہ علیہ وآلہ وسلم کے نام سے حکومت مخالف تحریک شروع کر دی اس تحریک کا خاتمہ جنرل ضیاء الحق کے مارشل لاء کے نفاذ پر ہوا،جس نے نہ صرف پیپلز پارٹی کی حکومت کا تختہ الٹ دیا بلکہ ذوالفقار علی بھٹو کو بھی پھانسی پر چڑھا دیا اور یہ ملک مظفر خان کی آخری جیت تھی کیونکہ 25,فروری 1985ء کو ہونے والے غیر جماعتی قومی انتخابات میں مقبول خان آف عیسیٰ خیل نے ملک مظفر خان کو شکست سے دوچار کیا اور پہلی بار سیاسی میدان میں اترنے والے ملک مخالف گروپ سے غلام رسول خان شادی خیل صوبائی اسمبلی کے رکن منتخب ہوئے 16, نومبر 1988ء کو قومی اسمبلی کے اور 19, نومبر کو صوبائی اسمبلی کے انتخابات ہوئے ،ملک مظفر خان نے دونوں نشستوں پر الیکشن لڑا لیکن قسمت کی دیوی اتنی نا مہربان تھی کہ دونوں نشستوں پر ہار گئے اور مولانا عبد الستار خان نیازی نے جیت کر اپنا سابقہ حساب برابر کر دیا اور صوبائی اسمبلی میں غلام رسول خان شادی خیل دوسری دفعہ پھر کامیاب ہو گئے ،،نواب آف کالاباغ کے اقتدار کی چولیں 1979ء میں پہلی بار بغوچی محاذ نے ہلائ تھیں اب دوسری بنی افغان میں ایک ناخوشگوار واقعے نے ایک بار نواب آف کالاباغ کے اقتدار کو ہلا کر رکھ دیا ،
Comments
جس کسی نے بھی ان تاریخی حقائق کو یکجا کر کے پریس کے حوالے کیا ہے ان کا بہت مشکور ہوں،
دربار سے وابسطہ تاریخ نویسوں کا یہ بھی المیہ ہے کہ وہ اپنی تمام تر صلاحیتوں کے باوجود بھی طاقت سے وابسطہ افراد کا ذکر کرتے ہیں تو انہیں بے یار و بے وسیلہ چیخوں کا ذکر ہدف کر دیتے ہیں جو تاریخی حقائق میں دبی ہوتی ہیں، میں 1969 سے پی پی پی سے ذہنی طور پر وابسطہ ہوں اور ان متعدد افراد کا آخری فرد ہوں جنہیں 1977 کے الیکشن کی آڑ میں 2 مارچ 1977 کو میرے دو مرحوم بھائیوں عبدالرحمان نیازی طارق نیازی، عبداللہ خان اندالی خیل، جہانگیر خان اندالی خیال اور دوسرے افراد کو مار دھاڑ کر کے اغوا کیا گیا اور 39 دنوں تک اپنے ٹارچر کیمپوں میں رکھا گیا، کاروبار، جائیداد اور گھریلو زیورات کے بدلے نوابوں نے رہا کیا اور ہمارے کاروباری ادارے فینسی جنرل سٹور کا سر عام لوٹا گیا۔۔۔۔دوسرا یہ کہ مسان کے علاقے میں غلام رسول نامی لڑکے کو خود نوابوں نے مارا۔۔۔ان تمام واقعات کی شنواوئی جج خواجہ خالد پال کے ایک رکنی بینچ میں موجود ہے اگر اس فائل کو ڈی سی آفس سے غائب نہ کر دیا گیا ہو۔۔۔۔۔
بالاج جیسل (محمد اقبال حجازی) راجپوت بھٹی خاندان سے تعلق رکھنے والے ایک تجربہ کار استاد، حساس قلمکار، اور تہذیبی ورثے کے سچے محافظ ہیں۔ انہوں نے تین دہائیوں تک تدریس سے وابستہ رہتے ہوئے علم کی روشنی پھیلائی، اور ساتھ ہی ساتھ کالاباغ، کوٹ چاندنہ اور میانوالی کی ثقافت، یادیں اور تاریخ اپنے سادہ مگر پُراثر انداز میں قلمبند کیں۔ ان کی تحریریں خلوص، سچائی اور دیہی زندگی کے جذبے سے لبریز ہوتی ہیں۔ وہ فیس بک پر فعال ادیب ہیں اور اپنی زمین، لوگوں اور ماضی سے جڑے تجربات کو محفوظ رکھنے کے لیے مسلسل لکھ رہے ہیں۔۔ اُن کا قلم مقامی زبان، محبت اور روایت کا ترجمان ہے.
