مرحوم گاؤں نورنگا -تحصیل و ضلع میانوالی م- دریائے سندھ کے کنارے

تحریر: سید محمد عقیل حسین شاہ نورنگا

یہ ہے منظر ہمارے مرحوم گاؤں نورنگا کا جو کہ تحصیل و ضلع میانوالی میں دریائے سندھ کے کنارے آباد تھا. یہ تصویر کسی خاص موقع کی نہیں بلکہ ہر سال گرمیوں کے موسم میں یہ منظر ہوتا تھا. سیلاب جون سے ستمبر تک رہتا تھا. مگر لوگ ہمت بالکل نہیں ہارتے تھے. زندگی کا پہیہ رواں دواں رہتا تھا.یہ گاؤں زندگی کی جملہ بنیادی ضروریات اور سہولیات سے محروم تھا. نہ سڑک، نہ گلیاں، نہ نالیاں، نہ بجلی، نہ گیس، نہ سیوریج، نہ لیٹرینیں، نہ ٹیلی-فون وغیرہ وغیرہ. لوگوں کا زیادہ تر ذریعہ معاش کھیتی باڑی تھا. ہل بیلوں کی جوڑی سے جوڑ کر چلاے جاتے تھے. ٹریکٹر اور تھریشر کا نام ونشان تک نہیں تھا. سارا کام جسمانی محنت و مشقت کا تھا اس لئے لوگوں کی عمومی صحت اچھی تھی. لوگ زیادہ تر گندم اگاتے تھے یا کچھ لوگ گنا بھی کاشت کر لیا کرتے تھے. یہاں گنے سے یاد آیا کہ کئ لوگوں نے گنے سے گڑ بنانے کیلئے بیلنے بھی رکھے ہوئے تھے جس سے گنے کا رس نکال کر بعد میں اس کو کڑاہے میں ڈال کر ایک خاص درجہ حرارت تک گرم کر کے گڑ بنایا جاتا تھا، بچے گڑ بننے کے عمل سے پہلے اس کی “پت” گنے پر لگا کر بہت مزے مزے سے کھایا کرتے تھے. یاد رہے کہ یہ پت گنے کے کھیت کے مالک کی خصوصی اجازت سے ملتی تھی. یہ “پت” صبح گرم گرم روٹی پر لگا کر ناشتے کیلئے بھی استعمال کی جاتی تھی. دوست محمد شاہ نے دیسی کھنڈ بنانے کی ایک مشین بھی رکھی ہوئی تھی جس سے کمادوں (گنے) کا جوس نکال کر اور “پت” بنانے کے عمل کے بعد ایک مخصوص طریقہ کار کو بروئے کار لاتے ہوئے دیسی کھنڈ بنائی جاتی تھی کیونکہ اس وقت ولایتی کھنڈ (چینی) کا دور دراز تک نام و نشان نہیں تھا. جب ولایتی کھنڈ کی گاؤں میں دریافت ہوئی تو خواتین مہمانوں کی آمد کے موقع پر ایک دوسرے سے یہ نایاب چینی مانگ کر چائے بناتی تھیں اور کہتی تھیں کہ اگر مہمانوں کو گڑ کی چائے پیش کی گئی تو اہل خانہ کی ناک کٹ جائے گی یوں چینی کہیں سے مل جانے کے بعد ناک بھی کٹنے سے بچ جاتی تھی یعنی عزت رہ جاتی تھی. یہ علیحدہ بات ہے کہ آج اتنے عرصے بعد پروفیسر ڈاکٹر حضرات بھی اصلی گڑ تلاش کرنے میں لگے ہوئے ہیں کیونکہ ان کے مطابق چینی کا استعمال در اصل نقصان دہ ہے. ہمارے گاؤں میں تقریباً ہر گھر نے اپنی ضرورت کے مطابق مرغیاں اور جانور گائے، بیل اور بھینسیں پال رکھی تھیں جن سے ان کا تازہ خالص دودھ، دہی اور مکھن کا گزارہ ہو جاتا تھا. جو اس سہولت سے محروم ہوتا اسے پڑوسی بغیر کسی معاوضہ کے یہ نعمتیں فراہم کر دیتے تھے کیونکہ وہ دودھ کو “نور پیر” کہتے تھے اور بیچنا گناہ سمجھتے تھے، میں اکثر سوچتا ہوں کہ ہم آج کہاں سے ایسے لوگ ڈھونڈیں گے. خلوص کا دور دورہ تھا. غریب اور امیر کا کوئی فرق نہیں تھا کیونکہ سب کے گھر ایک جیسے اور کچے تھے مگر دل انتہائی سچے تھے.

میانوالی شہر جو گاؤں سے چوبیس کلومیٹر کے فاصلے پر واقع ہے جانے کے لیے تقریباً دس کلومیٹر پیدل چلنا پڑتا تھا یا سائیکل پر وہ بھی جس کے نصیب میں ہوتا تھا. میانوالی جانے کے تین راستے تھے، روکھڑی براستہ چک دو سیری، تری خیل براستہ شیخاں والا اور موچھ براستہ شیخ آلی, سلطان والا یا محمد شریف والی. گاؤں میں کئی اوٹھی (اونٹوں کے مالک) بھی تھے جو دکانداروں کا سودا سلف لانے کے لئے صبح سویرے گاؤں سے میانوالی براستہ روکھڑی شہباز خیل سے جاتے اور شام سے پہلے واپس آ جاتے تھے. اونٹ کئی دفعہ خواتین کے لیئے زیادہ فاصلے کے لیے سواری کا کام بھی دیتے تھے. لیکن زیادہ تر خواتین اونٹ کے بیٹھنے اور اٹھنے کے مخصوص انداز سے بہت خوف کھاتی تھیں. چھوٹی عمر میں ایک دو دفعہ مجھے بھی اس خوفناک تجربے سے گزرنا پڑا. سواری سے یاد آیا کہ اس زمانے میں کچھ لوگوں نے اپنے شوق کے لیے اور سفری سہولیات کے لیے گھوڑیاں بھی پال رکھی تھیں ان میں سے مرید حسین شاہ اور برادران کی سفید رنگ کی اور دوست محمد شاہ کی لال رنگ کی گھوڑیاں پورے علاقے میں بہت مشہور تھیں. یہ بہت پلی ہوئ اور “اتھری” گھوڑیاں تھیں. کبھی کبھی لوگ ان سے ادھر ادھر جانے کے لئے یہ گھوڑیاں مانگ کر بھی لے جاتے تھے. بہت عرصے بعد غالباً 1984 میں اقبال حسین شاہ نے نورنگا میں پہلا موٹرسائیکل یاماہا خریدا تو سب لوگوں کو ایک اچھی سواری نصیب ہو گئ کیونکہ ان سے کافی لوگ یہ سواری مانگ کے لے جاتے تھے.

یہاں پر دکانداروں کے ذکر سے یاد آیا کہ اس زمانے میں سب سے مشہور دکان سید عطا حسین شاہ اور ان کے برادران سید مرید حسین شاہ اور الطاف حسین شاہ، ملک غلام محمد تھیم اور ملک غلام فرید ڈہرال کی تھیں. آخری والے صاحب بچوں میں ایک خاص وجہ سے کافی مشہور تھے. دادا نظر حسین شاہ کی پکوڑوں کی دکان بہت مشہور تھی. اس کے ساتھ نورنگا کی مشہور زمانہ آٹے کی چکی ہوا کرتی تھی. اسی چکی پر اس زمانے میں نورنگا کا پہلا قتل بھی ہوا تھا. ان دکانداروں کے کافی عرصہ بعد شیر بہادر شاہ، اقبال حسین شاہ، امان اللہ خان اور کئی اور لوگوں نے بھی دکانیں کھولی تھیں.

ان انتہائی نامساعد حالات کے باوجود یہ وہ علاقہ ہے جس نے تعلیم کے میدان میں پورے ضلع میانوالی، ڈویژن سرگودھا، صوبہ پنجاب اور پاکستان میں نام روشن کیا. اعلیٰ اور معیاری تعلیم کا سہرہ ہیڈماسٹر عطا محمد شاہ اور ان کی پوری ٹیم کو جاتا ہے انگریزی کے استاد سید اولاد حسین شاہ اپنے درس و تدریس کے طریقہ کار میں اپنی مثال آپ تھے. سب اساتذہ کرام نے غریب بچوں کے بہترین مستقبل کو سنوارنے کے لیے اپنی زندگیاں وقف کر دی تھیں. نورنگا سے ابتدائی تعلیم مڈل لیول تک حاصل کرنے کے بعد طلبہ کی اتنی مضبوط بنیاد بن جاتی تھی کہ انہیں سنٹرل ماڈل سکول میانوالی اور بعد ازاں جامع ہائ سکول میانوالی جیسے بہترین سکولوں میں آسانی سے داخلہ مل جاتا تھا. عطا محمد شاہ میانوالی جا کر باقاعدہ اپنے طالب علموں کی خبر لیا کرتے تھے. نورنگا کے تعلیم یافتہ ہزاروں کی تعداد میں لوگ مختلف اداروں میں بہت کامیابی کے ساتھ اپنے فرائض سرانجام دے چکے ہیں اور دے رہے ہیں.

سید عطا حسین شاہ نورنگا کا سیاسی تعارف بنے. نورنگا سیاسی لحاظ سے ان کے نام سے پہچانا جاتا تھا. سماجی لحاظ سے دادا شیر علی ڈہرال، استاد ملک محمد عثمان، سید امیر محمد شاہ اور ان کے بھائی سید عاشق حسین شاہ نمبر دار، ملک غلام محمد تھیم، ملک احمد چھیلو وغیرہ وغیرہ علاقے کی پہچان میں ایک نمایاں مقام رکھتے تھے. سید دوست محمد شاہ نے بھی کئی دفعہ کونسلر کا انتخاب جیت کر اہل علاقہ کی بہت خدمت کی اور لڑکیوں کا واحد پرائمری سکول ان کی کوششوں سے ہی بنا تھا.

اس کے علاوہ سادات خاندان میں بہت سی روحانی ہستیاں بھی موجود رہیں اور لوگ ان کی کرامات سے روحانی طور پر فیض یاب ہوتے رہے. یہ ہستیاں لوگوں کے جھگڑے، قتل، طلاقوں وغیرہ کے معاملات میں بھی صلح کرا دیتے تھے اور بات کبھی تھانے کچہری تک نہیں جاتی تھی. ایک میانہ خاندان سے بھی کئی لوگ روحانی طور پر فیض یاب ہوا کرتے تھے ان کے بزرگ روحانیت کے علاوہ علاج معالجے کے لیے بہت مشہور تھے.