مسمار تانگہ اسٹینڈ – میانوالی
میانوالی کے بس اسٹینڈ کے قریب یہ تانگہ اسٹینڈ ہماری بچپن کی کئی حسین یادوں کا محور رہا۔ بچپن میں اکثر ہم تانگوں کو دیکھتے، ان کی گھنٹیوں کی آواز اور قدموں کی چاپ سنتے تھے۔ پھر جیسے ہی سکول کے دن آئے، ہم نے دیکھا کہ تانگے آہستہ آہستہ ختم ہوگئے اور مشینی سواریوں نے ان کی جگہ لے لی۔ مختلف رنگوں کے خوب صورت اور قد آور گھوڑے اور ان کی شاندار بگیاں ہوتیں تھیں۔
بس اسٹینڈ سے سواریاں لے کر تانگے شہر کی جانب روانہ ہوتے اور واپسی پر اسی مقام پر آ کر رکتے، جہاں ایک زمانے میں رونق ہوتی تھی۔ بس اسٹینڈ کی مغربی سمت مسافر خانہ تھا جہاں لوگ آرام کرتے یا گاڑی کا انتظار کرتے اور اس کے سامنے تانگہ اسٹینڈ کی چہل پہل ہوا کرتی تھی۔ جیسے ہی تانگے ختم ہوئے اس جگہ نے رکشوں اور دیہی علاقوں سے آنے والی ڈاٹسن و دیگر گاڑیوں کی میزبانی کی، مگر یہ رونق بھی عارضی تھی۔ وقت کے ساتھ یہ جگہ ویرانی کا شکار ہوتی گئی اور یہ عمارت جو کبھی زندگی سے بھرپور ہوا کرتی تھی کافی سال خاموشی اور ویرانی کی تصویر بنی رہی۔
میانوالی–٦ نومبر ٢٠٢٤ ء، بدھ
