فقیر حافظ مظفر خان رحمتہ اللہ تعالٰی علیہ (حافظ والا)

فقیر حافظ مظفر خان ایک عظیم روحانی شخصیت تھے۔ آپ ہی کے دم قدم سے حافظ والا شہر کی بنیاد پڑی۔ آپ کے والد محترم کا نام اغر خان تھا ۔ آپ کا خاندان افغانستان سے دہلی آیا اور جنگ آزادی 1857 ء کے دوران جب افراتفری کا دور تھا دہلی سے نورپور تھل اور پھر جنڈانوالہ ضلع بھکر میں رہائش پذیر ہو گیا۔ فقیر مظفر خان کی پیدائش 1793 ء میں جنڈانوالہ میں ہوئی۔

آپ نے ابتدائی تعلیم و تربیت مقامی طور پر حاصل کی اور روحانی مدارج ٹمن ملتان تحصیل تلہ گنگ ضلع چکوال کی ایک بزرگ روحانی شخصیت کی معرفت طے کرتے رہے۔ آپ اکثر وہاں مرشد کی خدمت میں حاضر رہتے تھے۔ آپ نے اپنے مرشد کے حکم سے ہی گھر کو خیرباد کیا اور ایک جنگل بیابان جگہ پر ڈیرہ ڈال دیا۔ گھاس پھونس کی جھونپڑی میں اللہ اللہ کیا کرتے تھے۔ پھر انسانی ضروریات کی خاطر آپ نے یہاں ایک کنواں بنوایا۔ اللہ والوں کی کشش لوگوں کو یہاں اس صحرا میں لے آئی۔ آہستہ آہستہ لوگ آپ کی خدمت میں یہیں پر رہنے لگے اور یہ جگہ آپ ہی کی نسبت سے حافظ والا مشہور ہو گئی۔ آپ سے روحانی فیض حاصل کرنے والے بے شمار لوگ تھے خصوصاً سوانس کے علاقے کے لوگ آپ کے بے حد عقیدت مند تھے۔

آپ کے وصال کے بعد آپ کا شاندار روضہ بنانے کا پروگرام بنایا گیا۔ عظیم الشان بنیادیں رکھی گئیں لیکن نامعلوم وجوہات کی بناء پر اس کا روضہ نہ بنایا جا سکا۔ آج بھی آپ کے روضہ پاک کی عظیم الشان عمارت آپ سے محبت کرنے والوں کو یاد دلاتی ہے کہ آؤ اور جس محبت سے اس کی بنیادیں ڈالی تھیں اس ادھورے کام کو تکمیل تک پہنچاؤ۔

وصال: آپ کا وصال 10 شوال 1289 ھ بمطابق 1872 ء ہوا۔

اولاد: آپ کے دو بیٹے فقیر حافظ شیرمحمد اور فقیر حافظ فتح محمد تھے ۔ فقیر شیر محمد ایک بلند پایہ صوفی شاعر تھے آپ نے متعدد کافیاں تحریر فرمائیں۔ فقیرعبدالمجید خان تحصیل ناظم پپلاں آپ ہی کی اولاد میں سے تھے۔

حوالہ: تحریر شیخ محمد عارف صاحب SST گورنمنٹ ہائی سکول حافظ والا

فقیر حافظ مظفر خان حافظ والا قبرستان کی تصاویر جہاں حافظ مظفر ان کے بھائی بیٹے اور پوتے کی قبریں ہیں